පවතින යුද වාතාවරණය හමුවේ යුක්රේනය ලෝකයේ ප්රධානතම තාක්ෂණික පර්යේෂණ සහ සංවර්ධන කේන්ද්රස්ථානය බවට පත් කර ගැනීමට එරට රජය පියවර ගනිමින් සිටී. යුක්රේන ඩිජිටල් පරිවර්තන අමාත්ය මිකායිලෝ ෆෙඩ්රොව් පවසන පරිදි, සැබෑ යුද පිටියක නවීන තාක්ෂණික මෙවලම් පරීක්ෂා කිරීමට ලැබෙන මෙම අවස්ථාව ලෝකයේ වෙනත් කිසිදු රටකට නොලැබෙන සුවිශේෂී තත්ත්වයකි.
ඇමරිකාවේ Palantir Technologies වැනි දැවැන්ත දත්ත විශ්ලේෂණ සමාගම් මේ වන විට යුක්රේන රජයේ එදිනෙදා කටයුතු සහ යුද උපාය මාර්ග සඳහා සෘජුවම සම්බන්ධ වී ඇත. චන්ද්රිකා ඡායාරූප, ඩ්රෝන දර්ශන සහ විවෘත මූලාශ්ර දත්ත කෘත්රිම බුද්ධිය (AI) මගින් විශ්ලේෂණය කරමින් සතුරු ඉලක්ක හඳුනා ගැනීමට මෙම මෘදුකාංග භාවිත කෙරේ.
Microsoft, Amazon, Google සහ Starlink වැනි සමාගම් ද යුක්රේනයේ සයිබර් ආරක්ෂාව සහ දත්ත කළමනාකරණය වෙනුවෙන් විශාල වශයෙන් ආයෝජනය කර ඇත. මීට අමතරව, Clearview AI වැනි සමාගම් මුහුණු හඳුනාගැනීමේ තාක්ෂණය හරහා රුසියානු හමුදා සාමාජිකයන් හඳුනා ගැනීමට සහාය ලබා දෙයි.
යුක්රේන අගනුවර වන කියෙව් නගරය කේන්ද්ර කර ගනිමින් “Mil-Tech Valley” හෙවත් යුද තාක්ෂණ නිම්නයක් බිහිවෙමින් පවතින බව වාර්තා වේ. විදේශීය තාක්ෂණික සමාගම් තම ඉංජිනේරුවන් ද යුද බිමට යොමු කරමින්, හමුදා නිලධාරීන් සමඟ එක්ව නවීන මිලිටරි AI අත්හදා බැලීම් සිදු කරමින් සිටී.
මෙම ක්රියාවලිය ඉතිහාසයේ යුද්ධයක ස්වභාවය වෙනස් කරන ප්රධාන සාධකයක් බව එක්සත් ජනපද හමුදා ප්රධානීන් පවා පෙන්වා දෙයි. යුක්රේනය මෙම තාක්ෂණික දියුණුව තම රටේ අනාගත ආර්ථික සහ ආරක්ෂක වර්ධනය සඳහා ප්රධාන එන්ජිමක් ලෙස යොදා ගැනීමට බලාපොරොත්තු වේ.
