2027 වසරේ පැවැත්වීමට නියමිත අයිසීසී පිරිමි එක්දින ක්රිකට් ලෝක කුසලාන තරගාවලියේ සම සත්කාරක රටක් ලෙස කටයුතු කිරීම සිම්බාබ්වේ රාජ්යයට ලැබුණු සුවිශේෂී ගෞරවයක් බව සිම්බාබ්වේ ක්රිකට් ආයතනයේ සභාපති ටවේන්ග්වා මුකුහ්ලානි මහතා පවසයි. ජාත්යන්තර මට්ටමේ ප්රධාන ක්රිකට් තරගාවලියක් සාර්ථකව මෙහෙයවීමට තම රට සතු හැකියාව පිළිබඳ ලෝක ක්රිකට් ප්රජාව තැබූ විශ්වාසය මෙයින් මනාව පැහැදිලි වන බව ඔහු සඳහන් කරයි.
මෙම ලෝක කුසලාන තරගාවලිය සිම්බාබ්වේ, දකුණු අප්රිකාව සහ නැමීබියාව යන රටවල් තුනෙහිදී පැවැත්වීමට නියමිතය. තරගාවලිය සඳහා සත්කාරක නගර 12ක් තෝරාගෙන ඇති අතර, සිම්බාබ්වේ නියෝජනය කරමින් හරාරේ, බුලවායෝ සහ වික්ටෝරියා ෆෝල්ස් නගර ඒ සඳහා නම් කර තිබේ.
තරගාවලිය පැවැත්වෙන ක්රීඩාංගණ අතර හරාරේ ස්පෝර්ට්ස් ක්ලබ්, බුලවායෝහි ක්වීන්ස් ස්පෝර්ට්ස් ක්ලබ් සහ වික්ටෝරියා ෆෝල්ස්හි නවීන පහසුකම් සහිතව සංවර්ධනය කෙරෙන මෝසි-ඕවා-ටුන්යා ජාත්යන්තර ක්රිකට් ක්රීඩාංගණය ප්රධාන වේ.
සභාපතිවරයා වැඩිදුරටත් සඳහන් කළේ, මෙම තරගාවලිය ක්රිකට් ක්රීඩාවට පමණක් නොව, සිම්බාබ්වේහි සංස්කෘතිය, ආගන්තුක සත්කාරය සහ සංචාරක ක්ෂේත්රයේ ඇති සුවිශේෂී ස්ථාන ලොවට ප්රදර්ශනය කිරීමට ලැබෙන කදිම අවස්ථාවක් බවයි. දකුණු අප්රිකාව සහ නැමීබියාව සමඟ එක්ව අමතක නොවන තරගාවලියක් ලබාදීමට අපේක්ෂා කරන බවද ඔහු වැඩිදුරටත් කියා සිටියේය.
සිම්බාබ්වේ ක්රිකට් ආයතනයේ කළමනාකාර අධ්යක්ෂ ගිවමෝර් මකෝනි මහතා පෙන්වා දුන්නේ, මෙම තරගාවලිය හරහා යටිතල පහසුකම් සංවර්ධනය සහ ආර්ථික ක්රියාකාරකම් වර්ධනය ඇතුළු දිගුකාලීන ප්රතිලාභ රැසක් සිම්බාබ්වේ වෙත හිමිවනු ඇති බවයි.
