මොරොක්කෝ ඉතිහාසයේ සුවිශේෂී සන්ධිස්ථානයක් සනිටුහන් කරමින්, එරට පළමු කාන්තා අගමැතිනිය ලෙස ෆාතිමා එසාහ්රා එල් මන්සූරි පත් කර ඇති බව රාජකීය මාලිගය නිවේදනය කරයි. 50 හැවිරිදි එල් මන්සූරි මීට පෙර නාගරික සැලසුම් අමාත්‍යවරිය සහ මරකේෂ් නගරාධිපතිනිය ලෙස ද කටයුතු කර ඇත.
අරාබි ලෝකයේ අගමැති ධුරයකට පත්වන දෙවැනි කාන්තාව වන්නේ ද ඇයයි. තමන්ට පැවරී ඇති මෙම වගකීම මොරොක්කෝ කාන්තාවන්ගේ අභිමානයක් බව ඇය මාධ්‍ය වෙත අදහස් දක්වමින් ප්‍රකාශ කළාය.
පසුගියදා පැවති මැතිවරණයෙන් වැඩිම ආසන සංඛ්‍යාවක් දිනාගත් ‘Authenticity and Modernity’ (PAM) පක්ෂය නියෝජනය කරන ඇයට, නව රජයක් පිහිටුවීම සඳහා අවශ්‍ය සන්ධානය ගොඩනැගීමේ අභියෝගය මේ වන විට පැවරී තිබේ. පාර්ලිමේන්තුවේ පූර්ණ බහුතරයක් නොමැති වීම හේතුවෙන් දේශපාලන පක්ෂ සමඟ සාකච්ඡා කිරීම ඇයගේ මූලික කාර්යය වනු ඇත.
නීතිවේදිනියක වන එල් මන්සූරි, මරකේෂ් නගරාධිපතිනිය ලෙස කටයුතු කළ සමයේ නාගරික සංවර්ධනය සහ භූමිකම්පාවෙන් පීඩාවට පත් ජනතාව නැවත පදිංචි කිරීම වැනි ප්‍රධාන ව්‍යාපෘති ගණනාවක අධීක්ෂණය සිදු කළාය. ඉදිරියේදී පැවැත්වීමට නියමිත 2030 FIFA ලෝක කුසලානය සඳහා වන ආයෝජන සැලසුම් සම්බන්ධයෙන් ද ඇයගේ නායකත්වයෙන් යුත් නව රජයට තීරණ ගැනීමට සිදුවනු ඇත.
