මීගොඩ, ඕවිටිගම ප්‍රදේශයේදී පුද්ගලයෙකු තියුණු ආයුධයකින් පහර දී ඝාතනය කර ඇති බව මීගොඩ පොලිසිය පවසයි. මෙම සිද්ධියෙන් ජීවිතක්ෂයට පත්ව ඇත්තේ එම ප්‍රදේශයේම පදිංචි 50 හැවිරිදි පුද්ගලයෙකි.
මියගිය පුද්ගලයා කුඩා වෙළඳසැලක් පවත්වාගෙන යමින් සිටි අයෙකු බව වාර්තා වේ. සැකකරු සහ මියගිය පුද්ගලයා අතර කලක සිට පැවති පෞද්ගලික ආරවුලක් මෙම ඝාතනයට හේතු වී ඇති බව පොලිස් විමර්ශනවලදී අනාවරණය වී තිබේ.
සැකකරු මීට පෙර අවස්ථා කිහිපයකදීම මියගිය පුද්ගලයාගේ වෙළඳසැල අසලට පැමිණ බැන තර්ජනය කර ඇති බවට තොරතුරු ලැබී ඇත. එම ආරවුල උත්සන්න වීමත් සමඟ සැකකරු විසින් තියුණු ආයුධයකින් පහර දී ඇති අතර, බරපතළ තුවාල ලැබූ වින්දිතයා රෝහලට රැගෙන යන අතරතුර මියගොස් තිබේ.
සැකකරු ප්‍රදේශයෙන් පළා ගොස් ඇති අතර, ඔහුව අත්අඩංගුවට ගැනීම සඳහා මීගොඩ පොලිසිය විසින් විශේෂ පොලිස් කණ්ඩායම් දෙකක් යොදවා විමර්ශන ආරම්භ කර ඇත. සිද්ධිය සම්බන්ධයෙන් වැඩිදුර පරීක්ෂණ මීගොඩ පොලිසිය විසින් සිදු කරනු ලබයි.
