සෞදි අරාබියේ අධිකරණ ක්රියාවලියකට මුහුණ දී සිටින ශ්රී ලාංකික පුරවැසි සිවරාසා අනෝජන් හට සමාව ලබා දී ඔහුගේ ජීවිතය බේරාගන්නා ලෙස සෞදි නායකත්වයෙන් ශ්රී ලංකාවේ ප්රමුඛ මාධ්ය සංවිධාන පහක් විශේෂ ආයාචනයක් සිදුකර තිබේ.
මෙම මාධ්ය සංවිධාන විසින් නිකුත් කළ ඒකාබද්ධ ප්රකාශයක දැක්වෙන්නේ, සෞදි අරාබියේ පවතින නීතිමය ක්රියාවලියට තමන් ගරු කරන අතරම, මෙම සිදුවීමෙහි පවතින මානුෂීය පැතිකඩ කෙරෙහි අවධානය යොමු කර දයාව සහ අනුකම්පාව දක්වන ලෙසයි. ඉස්ලාමීය දහමේ උගන්වන සමාව දීම සහ අනුකම්පාව පිළිබඳ ගුණාංග සිහිපත් කරමින් ඔවුන් මෙම ඉල්ලීම සිදුකර ඇත.
සිංහල, දෙමළ සහ මුස්ලිම් ප්රජාවන් නියෝජනය කරන මෙම මාධ්ය සංවිධාන අවධාරණය කරන්නේ, අනෝජන්ගේ ජීවිතය බේරාගැනීම දෙරට අතර පවතින දීර්ඝකාලීන මිත්රත්වය තවදුරටත් ශක්තිමත් කිරීමට හේතුවනු ඇති බවයි. ඔහුට සමාව ලැබීම ශ්රී ලාංකික ජනතාවගේ මහත් අගය කිරීමට ලක්වනු ඇති බව ද එම ප්රකාශයේ සඳහන් වේ.
මේ අතර, මෙම නඩුව සම්බන්ධයෙන් රාජ්ය තාන්ත්රික මට්ටමින් මැදිහත් වී දයානුකම්පිත විසඳුමක් ලබා ගැනීමට උත්සාහ කරන ලෙස ශ්රී ලංකා රජයෙන් ද එම සංවිධාන ඉල්ලා සිටී. විදේශ කටයුතු අමාත්යාංශය මේ වන විටත් සෞදි බලධාරීන් සමඟ රාජ්ය තාන්ත්රික මාර්ග ඔස්සේ සම්බන්ධ වී කටයුතු කරමින් සිටින බව තහවුරු කර ඇත.
මෙම ඒකාබද්ධ ආයාචනය සඳහා නිදහස් මාධ්ය ව්යාපාරය, දකුණු ආසියානු මාධ්ය කාන්තා සංසදය, ශ්රී ලංකා වැඩ කරන මාධ්යවේදීන්ගේ සංගමය, දෙමළ මාධ්ය සන්ධානය සහ ශ්රී ලංකා මුස්ලිම් මාධ්ය සංසදය එක්ව සිටිති.
