ශ්‍රී ලංකාවේ වන අලි මුහුණපාන බරපතළ ගැටලු සහ වන විනාශයන්ට එරෙහිව විරෝධය පළ කරමින් අලි රංචුවක් කොළඹ ප්‍රදේශයට පැමිණ තිබේ. අදාළ සංදේශයක් ජනාධිපතිවරයා වෙත භාරදීම සඳහා මෙම පිරිස කොළඹට පැමිණි බව වාර්තා වේ.
මිනිසුන් විසින් කැලෑ කපා හැරීම, වාසභූමි අහිමි කිරීම මෙන්ම වෙඩි තැබීම් හේතුවෙන් අලි ඇතුන් දිනෙන් දින දැඩි දුෂ්කරතාවන්ට මුහුණපා සිටින බව මෙම ගමනට එක්වූ අලි නියෝජිතයෙකු සඳහන් කර ඇත. විශේෂයෙන්ම දළ ලබාගැනීමේ අරමුණින් වන සතුන්ට සිදුවන වෙඩි තැබීම් ඉහළ ගොස් ඇති බව ඔවුන් පෙන්වා දී තිබේ.
මීට අමතරව, ප්‍රතිකාර සඳහා වනජීවී නිලධාරීන් ලබාදෙන අධික මාත්‍රා සහිත එන්නත් හේතුවෙන් සතුන් මියයාම මෙන්ම කැලෑවලට දමන පොලිතින් අපද්‍රව්‍ය අනුභව කිරීම නිසා සතුන් රෝගී වීමද බරපතළ උවදුරක් බවට පත්ව ඇතැයි සඳහන් වේ.
ජනාධිපති මන්දිරය අසලට පැමිණි මෙම අලි රංචුව ආරක්ෂක අංශ විසින් පාලනය කිරීමට කටයුතු කර ඇති අතර, පසුව ඔවුන් විහාරමහා දේවී උද්‍යානය වෙත ගොස් තිබේ. කෙසේ වෙතත්, නගර සභා බලධාරීන්ගේ දැනුම්දීම මත එම පිරිස යළිත් කැලෑ ප්‍රදේශය බලා පිටත්ව ගොස් ඇත.
