ඇමරිකාවේ වොෂිංටන් ඩී.සී. හි පිහිටි ස්මිත්සෝනියන් ජාතික සත්වෝද්යානයේ සිටින යෝධ පැන්ඩාවෙකු වන ක්වින් බාඕ (Qing Bao) සිය පස්වන උපන්දිනය පසුගිය සෙනසුරාදා ඉතා උත්සවාකාරයෙන් සැමරීය. මෙම අවස්ථාව නැරඹීම සඳහා විශාල පිරිසක් සත්වෝද්යානය වෙත පැමිණ සිටියහ.
මීට වසර දෙකකට පෙර සත්වෝද්යානයට පැමිණි අවස්ථාවේදී ලැජ්ජාශීලී ස්වභාවයක් පෙන්නුම් කළ ක්වින් බාඕ, මේ වන විට නරඹන්නන්ගේ ආකර්ෂණය දිනාගන්නා දඟකාර පැන්ඩාවෙකු බවට පත්ව සිටියි. ඇයගේ උපන්දිනය වෙනුවෙන් සත්වෝද්යාන බලධාරීන් ඇයගේ වාසස්ථානය විශේෂ සැරසිලිවලින් අලංකාර කර තිබුණි.
ක්වින් බාඕ වෙනුවෙන් ශීත කළ මිදි, ප්ලම්, ඇපල් සහ කැරට් යුෂ යොදාගෙන 1970 දශකයේ මෝටර් රථයක හැඩයෙන් යුත් විශේෂ පලතුරු කේක් එකක් ද සකස් කර තිබුණි. මෙම කේක් එක රස විඳීමෙන් පසු ඇය සෙල්ලම් බඩු සමඟ විනෝද වන ආකාරය නරඹන්නන්ගේ අවධානයට ලක් විය.
සත්වෝද්යානයේ යෝධ පැන්ඩා අංශයේ සහකාර භාරකරු ලෝරි තොම්සන් පවසන්නේ ක්වින් බාඕ සහ ඇය සමඟ සිටින බාඕ ලී යන පැන්ඩාවන් දෙදෙනාම ඉතා යහපත් සෞඛ්ය තත්ත්වයෙන් පසුවන බවයි. ඔවුන්ගේ සෞඛ්ය වාර්තා නිතිපතා චීන විශේෂඥයන් වෙත යොමු කෙරෙන අතර, ඔවුන්ගේ උපදෙස් මත සත්කාර කටයුතු සිදු කෙරේ.
මෙම උපන්දිනයට සමගාමීව ඇමරිකාවේ චීන තානාපති කාර්යාලය විසින් පැන්ඩා තේමා කරගත් සංස්කෘතික වැඩසටහන් රැසක් සංවිධානය කර තිබුණි. චීනය සහ ඇමරිකාව අතර සබඳතා ශක්තිමත් කරන පාලමක් ලෙස මෙම සත්ත්ව විශේෂය වැදගත් වන බවත්, ඔවුන් ආරක්ෂා කර ගැනීම සාමූහික ප්රයත්නයක් බවත් සත්වෝද්යාන බලධාරීන් වැඩිදුරටත් අවධාරණය කළහ.
