හොර්මුස් සමුද්‍ර සන්ධියේ පිහිටි ඉරානයේ කෙෂ්ම් දූපත ඉලක්ක කර ගනිමින් ඇමරිකානු හමුදාව විසින් පසුගිය සඳුදා ගුවන් ප්‍රහාර එල්ල කර ඇත. මෙම ප්‍රහාර තමන් විසින් දියත් කළ ආරක්ෂක පියවරක් බව ඇමරිකානු නිලධාරීන් දෙදෙනෙකු තහවුරු කර තිබේ.
මෙම ගුවන් ප්‍රහාර ඉරානයට එරෙහිව පුළුල් යුද මෙහෙයුමක් ආරම්භ කිරීමක් නොවන බවත්, පසුගිය සති කිහිපය තුළ කලාපයේ වෙළෙඳ නෞකා ඉලක්ක කර ගනිමින් ඉරානය සිදුකළ ප්‍රහාරවලට ප්‍රතිචාර දැක්වීමක් ලෙස මෙය සිදු වූ බවත් එම නිලධාරීන් පවසයි.
කෙසේ වෙතත්, වැරදි අර්ථකථන වළක්වා ගැනීම සඳහා මෙම ප්‍රහාර පිළිබඳ තොරතුරු මීට පෙර ප්‍රසිද්ධ නොකිරීමට ඇමරිකාව පියවර ගෙන තිබුණි. මෙම ප්‍රහාරය ඇමරිකානු ගුවන් යානයකට එල්ල වූ ප්‍රහාරයකට ප්‍රතිචාරයක් ලෙස සිදුවූවක් බව ද වාර්තා වේ.
ඉරානයේ රාජ්‍ය මාධ්‍ය වාර්තා කර ඇත්තේ කෙෂ්ම් දූපත ආශ්‍රිතව පිපිරීම් කිහිපයක හඬ ඇසුණු බවයි. මීට පෙර ඉරානය විසින් ඇමරිකානු ඔත්තු බැලීමේ ඩ්‍රෝන යානා දෙකක් බිම හෙළු බවට කළ ප්‍රකාශය ඇමරිකාව විසින් ප්‍රතික්ෂේප කර තිබේ.
