පොදු මාර්ග භාවිතයේදී වාහන හිමියන් තමන්ගේ පෞද්ගලික අභිමතය පරිදි කටයුතු කිරීමේ ප්රවණතාවය නතර කළ යුතු බව ප්රවාහන අමාත්ය බිමල් රත්නායක මහතා අවධාරණය කරයි. ‘මගේ වාහනය, මගේ ඉන්ධන’ යන ආකල්පය පොදු මාර්ගවලට අදාළ නොවන බවත්, මාර්ග ආරක්ෂාව සම්බන්ධයෙන් සියලුම රියදුරන් නීතියට අනුකූලව කටයුතු කළ යුතු බවත් අමාත්යවරයා පෙන්වා දෙයි.
මගී ප්රවාහන බස් රථවල පවතින යාන්ත්රික දෝෂ හේතුවෙන් සිදුවන අනතුරු අවම කර ගැනීම සඳහා රජය නව වැඩපිළිවෙලක් හඳුන්වා දී ඇත. ඒ අනුව, කිලෝමීටර 5,000කට වඩා ධාවනය වන සහ වන්දනා ගමන් සඳහා යොදා ගන්නා මගී ප්රවාහන වාහන සඳහා සෑම මාස තුනකට වරක්ම මාර්ග යෝග්යතා පරීක්ෂාව සිදු කර සහතික ලබා ගැනීම අනිවාර්ය වේ.
මෙම සහතික කිරීමේ ක්රියාවලිය සඳහා පිළිගත් සහ ලියාපදිංචි ගරාජ සම්බන්ධ කර ගැනීමට සැලසුම් කර ඇති අතර, එමගින් සුදුසුකම් ලත් කාර්මික ශිල්පීන්ගේ සේවය ලබා ගැනීමට අවස්ථාව උදාවේ. නීති උල්ලංඝනය කරන රියදුරන්ට සහ වාහන හිමියන්ට එරෙහිව දැඩි නීතිමය පියවර ගැනීමට පොලිස් නිලධාරීන්ට උපදෙස් ලබා දී ඇත.
තවද, මූලික වශයෙන් භාණ්ඩ ප්රවාහනය සඳහා නිර්මාණය කරන ලද වාහන මගී ප්රවාහන බස් රථ ලෙස මෙරටට ආනයනය කිරීම තහනම් කිරීමට ද පියවර ගෙන තිබේ. මාර්ග අනතුරු හුදකලා සිදුවීම් ලෙස නොසලකා, ඒවායේ මූලික හේතු අධ්යයනය කර ප්රායෝගික ආරක්ෂක පියවරයන් හඳුන්වා දීමේ වැදගත්කම ද අමාත්යවරයා මෙහිදී වැඩිදුරටත් අවධාරණය කළේය.
